ବେଜିଂ: ଚୀନର ପୂର୍ବାଞ୍ଚଳ ଜିଆଙ୍ଗସି ପ୍ରଦେଶରେ ପ୍ରବଳ ବର୍ଷା ପରେ ଭୟଙ୍କର ଭୂସ୍ଖଳନ ଘଟି ବଡ଼ ଧରଣର ବିପର୍ଯ୍ୟୟ ଦେଖାଦେଇଛି। ଟ୍ରପିକାଲ୍ ସାଇକ୍ଲୋନ୍ ସାଉଡେଲ୍ର ପ୍ରଭାବରେ କେତେକ ଦିନ ଧରି ଲଗାତାର ପ୍ରବଳ ବର୍ଷା ହେବା ପରେ ସୁଇଚୁଆନ୍ କାଉଣ୍ଟିର ଏକ ଗାଁରେ ଏହି ଭୂସ୍ଖଳନ ଘଟିଛି। ସଦ୍ୟତମ ରିପୋର୍ଟ ଅନୁସାରେ ଘଟଣାରେ ଅତି କମରେ ୨ ଜଣଙ୍କ ମୃତ୍ୟୁ ହୋଇଥିବାବେଳେ ୧୦ ଜଣ ଏବେ ମଧ୍ୟ ନିଖୋଜ ଅଛନ୍ତି।
ସୂଚନା ଅନୁସାରେ, ଶନିବାର ଭୋର ପ୍ରାୟ ୪ଟା ସମୟରେ ସୁଇଚୁଆନ୍ କାଉଣ୍ଟିର ଗାଓପିଙ୍ଗ୍ ଅଞ୍ଚଳର ଏକ ଗାଁରେ ହଠାତ୍ ପାହାଡ଼ରୁ ମାଟି ଓ ପଥର ଧସି ତଳକୁ ଆସିଥିଲା। ଏହାର ପ୍ରଭାବରେ ପ୍ରାୟ ଏକ ଡଜନ୍ ଘର କ୍ଷତିଗ୍ରସ୍ତ ହୋଇଛି। ଘର ଓ ମାଟି ତଳେ ଲୋକେ ଫସିଥିବା ଆଶଙ୍କା କରାଯାଇଥିବାରୁ ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ କରାଯାଇଥିଲା। ପ୍ରାରମ୍ଭିକ ରିପୋର୍ଟରେ ଜଣେ ବ୍ୟକ୍ତିଙ୍କ ମୃତ୍ୟୁ ଓ ୧୧ ଜଣ ନିଖୋଜ ଥିବା କୁହାଯାଇଥିଲା। ପରେ ଉଦ୍ଧାରକାରୀ ଦଳ ଆଉ ଜଣଙ୍କ ମୃତଦେହ ଠାବ କରିବା ପରେ ମୃତ୍ୟୁସଂଖ୍ୟା ୨କୁ ବୃଦ୍ଧି ପାଇଛି।
ଭୂସ୍ଖଳନ ପରେ ଉଦ୍ଧାରକାର୍ଯ୍ୟକୁ ଜୋରଦାର କରାଯାଇଛି। ଅଗ୍ନିଶମ ବାହିନୀ ଓ ଉଦ୍ଧାରକାରୀ ଦଳ ଘଟଣାସ୍ଥଳରେ ମାଟି ହଟାଇ ନିଖୋଜ ଲୋକଙ୍କୁ ଖୋଜୁଛନ୍ତି। ଡ୍ରୋନ୍, ଜୀବନ ଚିହ୍ନଟକାରୀ ଯନ୍ତ୍ର ଏବଂ ଅନ୍ୟାନ୍ୟ ଆଧୁନିକ ଉପକରଣର ସହାୟତା ନିଆଯାଉଛି। ରାସ୍ତା କ୍ଷତିଗ୍ରସ୍ତ ହୋଇଥିବାରୁ ଉଦ୍ଧାରକାରୀଙ୍କୁ ଘଟଣାସ୍ଥଳରେ ପହଞ୍ଚିବାରେ ମଧ୍ୟ ସମସ୍ୟା ହୋଇଥିଲା। ପ୍ରତିକୂଳ ପାଣିପାଗ ମଧ୍ୟ ଉଦ୍ଧାର କାର୍ଯ୍ୟକୁ ଅଧିକ କଷ୍ଟକର କରିଛି।
ଏହି ବିପର୍ଯ୍ୟୟର ମୁଖ୍ୟ କାରଣ ଭାବେ ସାଉଡେଲ୍ର ପ୍ରଭାବରେ ହୋଇଥିବା ଲଗାତାର ପ୍ରବଳ ବର୍ଷାକୁ ଦାୟୀ କରାଯାଉଛି। ସାଉଡେଲ୍ ପ୍ରଥମେ ଅଗଷ୍ଟ ୨୮ରେ ଚୀନର ଝେଜିଆଙ୍ଗ୍ ପ୍ରଦେଶରେ ପ୍ରବେଶ କରିଥିଲା। ପରେ ସେପ୍ଟେମ୍ବର ୩ରେ ଏହା ଫୁଜିଆନ୍ ପ୍ରଦେଶରେ ଟ୍ରପିକାଲ୍ ଷ୍ଟର୍ମ ଭାବେ ପହଞ୍ଚିଥିଲା। ଝେଜିଆଙ୍ଗ୍ ଓ ଫୁଜିଆନ୍ ଉଭୟ ଜିଆଙ୍ଗସିର ପଡ଼ୋଶୀ ପ୍ରଦେଶ ହୋଇଥିବାରୁ ଏହାର ବର୍ଷାର ପ୍ରଭାବ ଜିଆଙ୍ଗସିରେ ମଧ୍ୟ ପଡ଼ିଛି।
ବର୍ଷା ଓ ବନ୍ୟା ପରିସ୍ଥିତିକୁ ଦେଖି ଜିଆଙ୍ଗସିରେ ହଜାର ହଜାର ଲୋକଙ୍କୁ ବିପଦପୂର୍ଣ୍ଣ ଅଞ୍ଚଳରୁ ସୁରକ୍ଷିତ ସ୍ଥାନକୁ ନିଆଯାଇଛି। ପ୍ରଦେଶରେ ପ୍ରାୟ ୧.୬ ଲକ୍ଷ ଲୋକ ସାଉଡେଲ୍ ପ୍ରଭାବରେ ପ୍ରଭାବିତ ହୋଇଥିବା ସ୍ଥାନୀୟ କର୍ତ୍ତୃପକ୍ଷ କହିଛନ୍ତି। ଚୀନ୍ ସରକାର ମଧ୍ୟ ଭୂତାତ୍ତ୍ୱିକ ବିପର୍ଯ୍ୟୟ ପାଇଁ ଜରୁରୀ ପ୍ରତିକ୍ରିୟା ବଢ଼ାଇଛି ଏବଂ ଉଦ୍ଧାରକାର୍ଯ୍ୟରେ ବିଶେଷଜ୍ଞ ଦଳ ନିୟୋଜିତ କରିଛି।
ସାଇକ୍ଲୋନ୍ ସାଉଡେଲ୍ର ପ୍ରଭାବ କେବଳ ଜିଆଙ୍ଗସିରେ ସୀମିତ ରହିନାହିଁ। ଚୀନର ଅନ୍ୟାନ୍ୟ ଅଞ୍ଚଳରେ ମଧ୍ୟ ପ୍ରବଳ ବର୍ଷା, ବନ୍ୟା ଓ ଭୂସ୍ଖଳନ ଯୋଗୁଁ ଲୋକେ ପ୍ରଭାବିତ ହୋଇଛନ୍ତି। ଫୁଜିଆନ୍ରେ ମଧ୍ୟ ବହୁ ଘର ଭୁଶୁଡ଼ିଥିବା ଏବଂ ବିପଦପୂର୍ଣ୍ଣ ଅଞ୍ଚଳରୁ ବହୁ ସଂଖ୍ୟକ ଲୋକଙ୍କୁ ସ୍ଥାନାନ୍ତର କରାଯାଇଥିବା ରିପୋର୍ଟ ଆସିଛି।
ଏବେ ଜିଆଙ୍ଗସିରେ ନିଖୋଜ ଲୋକଙ୍କୁ ଜୀବିତ ଉଦ୍ଧାର କରିବା ଉଦ୍ଧାରକାରୀଙ୍କ ପ୍ରମୁଖ ଲକ୍ଷ୍ୟ ରହିଛି। ମାଟି ତଳେ ଆଉ କେହି ଫସି ରହିଛନ୍ତି କି ନାହିଁ, ତାହା ଜାଣିବା ପାଇଁ ତଲାସୀ ଅଭିଯାନ ଜାରି ରହିଛି। ପାଣିପାଗ ଅସ୍ଥିର ଥିବାରୁ ପୁଣି ଭୂସ୍ଖଳନ ଓ ବନ୍ୟାର ଆଶଙ୍କା ଥିବାରୁ ପ୍ରଶାସନ ପକ୍ଷରୁ ଲୋକଙ୍କୁ ସତର୍କ ରହିବାକୁ କୁହାଯାଇଛି।
