ନୂଆଦିଲ୍ଲୀ: ଲାଲ ସାଗର ଅଞ୍ଚଳରେ ହୁତି ବିଦ୍ରୋହୀଙ୍କ ବଢୁଥିବା ପ୍ରଭାବ ମଧ୍ୟରେ ଆମେରିକା ଓ ହୁତି ପ୍ରତିନିଧିଙ୍କ ମଧ୍ୟରେ ଆଲୋଚନା ହୋଇଥିବା ଖବର ସାମ୍ନାକୁ ଆସିଛି। ଓମାନର ମସ୍କାଟସ୍ଥିତ ଆମେରିକୀୟ ଦୂତାବାସରେ ଏହି ଆଲୋଚନା ହୋଇଥିବା ରିପୋର୍ଟ ମିଳିଛି। ଲାଲ ସାଗରରେ ନୌପରିବହନ ସୁରକ୍ଷା, ବାବ୍-ଅଲ-ମନ୍ଦେବ୍ ଜଳସନ୍ଧି ଏବଂ ଆମେରିକା-ହୁତି ଯୁଦ୍ଧବିରତି ଜାରି ରଖିବା ନେଇ ଏହି ଆଲୋଚନା ହୋଇଥିବା କୁହାଯାଉଛି।
ରିପୋର୍ଟ ଅନୁସାରେ, ହୁତି ପକ୍ଷ ଆମେରିକୀୟ ଅଧିକାରୀଙ୍କୁ କହିଥିବା ଜଣାପଡ଼ିଛି ଯେ ୨୦୨୫ରେ ଆମେରିକା ସହ ହୋଇଥିବା ଯୁଦ୍ଧବିରତିକୁ ସେମାନେ ଜାରି ରଖିବାକୁ ଚାହୁଁଛନ୍ତି। ଏହାସହ ଆମେରିକୀୟ ଜାହାଜକୁ ଟାର୍ଗେଟ କରିବା ତାଙ୍କ ଉଦ୍ଦେଶ୍ୟ ନୁହେଁ ବୋଲି ହୁତି ପ୍ରତିନିଧିମାନେ ସଙ୍କେତ ଦେଇଥିବା ଖବର ରହିଛି। ଏହି ଆଲୋଚନା ଓମାନର ମଧ୍ୟସ୍ଥତାରେ ହୋଇଥିବା କୁହାଯାଉଛି।
ଆମେରିକା ଓ ହୁତିଙ୍କ ମଧ୍ୟରେ ଏଭଳି ଆଲୋଚନାର ଖବର ଏକ ଗୁରୁତ୍ୱପୂର୍ଣ୍ଣ ସମୟରେ ଆସିଛି। ଗତ କିଛି ଦିନ ଧରି ହୁତି ବିଦ୍ରୋହୀମାନେ ୟେମେନର ଲାଲ ସାଗର ଉପକୂଳରେ ନିଜ ନିୟନ୍ତ୍ରଣ ବଢ଼ାଇଛନ୍ତି। ସେମାନେ ମୋଖା ବନ୍ଦର ସହ ବାବ୍-ଅଲ-ମନ୍ଦେବ୍ ଜଳସନ୍ଧି ନିକଟବର୍ତ୍ତୀ କିଛି ଅଞ୍ଚଳ ଓ ଦ୍ୱୀପ ଦଖଲ କରିଥିବା ରିପୋର୍ଟ ରହିଛି। ଏହି ଜଳପଥ ବିଶ୍ୱ ବାଣିଜ୍ୟ ପାଇଁ ଅତ୍ୟନ୍ତ ରଣନୀତିକ ମାର୍ଗ ଭାବେ ପରିଚିତ। ସାଧାରଣ ସମୟରେ ବିଶ୍ୱ ବାଣିଜ୍ୟର ପ୍ରାୟ ୧୨ ପ୍ରତିଶତ ଏହି ଜଳପଥ ଦେଇ ଯାଏ।
ହୁତିଙ୍କ ବଢ଼ୁଥିବା ପ୍ରଭାବରେ ସବୁଠାରୁ ଅଧିକ ଚାପରେ ପଡ଼ିଛି ସାଉଦି ଆରବ। ହୁତି ବିଦ୍ରୋହୀମାନେ ସାଉଦି ଜାହାଜ ଓ ତୈଳ ଭିତ୍ତିଭୂମିକୁ ଟାର୍ଗେଟ କରୁଥିବା ଖବର ଆସିଛି। ଏହା ସାଉଦି ଆରବର ତୈଳ ରପ୍ତାନି ଓ ସମୁଦ୍ରପଥ ଉପରେ ଚିନ୍ତା ବଢ଼ାଇଛି। ବାବ୍-ଅଲ-ମନ୍ଦେବ୍ ଜଳସନ୍ଧି ନିକଟରେ ହୁତିଙ୍କ ଉପସ୍ଥିତି ବଢ଼ିବାରୁ ସାଉଦି ତୈଳ ପରିବହନ ପାଇଁ ନୂଆ ସୁରକ୍ଷା ଚ୍ୟାଲେଞ୍ଜ ସୃଷ୍ଟି ହୋଇଛି।
ଏହି ପରିସ୍ଥିତିରେ ସାଉଦି ଆରବ ଆମେରିକାର ସହଯୋଗ ଆଶା କରୁଥିଲେ ମଧ୍ୟ ୱାଶିଂଟନ୍ ସିଧାସଳଖ ସାମରିକ ହସ୍ତକ୍ଷେପରୁ ଦୂରେଇ ରହିଛି। ରିପୋର୍ଟ ଅନୁସାରେ ସାଉଦି କ୍ରାଉନ୍ ପ୍ରିନ୍ସ ମହମ୍ମଦ ବିନ୍ ସଲମାନ୍ ଆମେରିକାଠାରୁ ହୁତିଙ୍କ ବିରୋଧରେ ସାମରିକ ସହାୟତା ଚାହିଥିଲେ। କିନ୍ତୁ ଆମେରିକା ବର୍ତ୍ତମାନ ସିଧାସଳଖ ଯୁଦ୍ଧରେ ସାମିଲ ହେବାକୁ ଆଗ୍ରହୀ ନୁହେଁ ବୋଲି ରିପୋର୍ଟରୁ ଜଣାପଡ଼ିଛି।
ଆମେରିକାର ଉପରାଷ୍ଟ୍ରପତି ଜେଡି ଭାନ୍ସ ମଧ୍ୟ ହୁତି ପକ୍ଷ ସହ ସିଧାସଳଖ ଯୋଗାଯୋଗ ଚାଲିଥିବା କଥା କହିଛନ୍ତି। ତେବେ ଏପର୍ଯ୍ୟନ୍ତ ଆମେରିକା ଓ ହୁତିଙ୍କ ମଧ୍ୟରେ କୌଣସି ଔପଚାରିକ ଚୁକ୍ତି ହୋଇଥିବାର ସରକାରୀ ନିଶ୍ଚିତତା ମିଳିନାହିଁ। କିଛି ବିଶ୍ଳେଷକ ତଥାପି ଦୁଇ ପକ୍ଷ ମଧ୍ୟରେ ଏକ ପ୍ରକାର ଅନୌପଚାରିକ ବୁଝାମଣା ହୋଇଥାଇପାରେ ବୋଲି ମତ ଦେଇଛନ୍ତି।
ଏହି ସଙ୍କଟର ପ୍ରଭାବ ଅନ୍ତର୍ଜାତୀୟ ତୈଳ ବଜାର ଉପରେ ମଧ୍ୟ ପଡ଼ିଛି। ସାଉଦି ତୈଳ ଯୋଗାଣ ବାଧାପ୍ରାପ୍ତ ହେବାର ଆଶଙ୍କାରେ ଗତ କିଛି ଦିନ ଧରି ଅଶୋଧିତ ତୈଳ ଦର ବଢ଼ିଥିଲା। ତେବେ ସାଉଦି ଆରବ ତାର ଇଷ୍ଟ-ୱେଷ୍ଟ ପାଇପଲାଇନର କିଛି କ୍ଷମତା ପୁନଃସ୍ଥାପନ କରୁଥିବା ଏବଂ ଓମାନ ମାର୍ଗରେ ଏସିଆକୁ ଅଧିକ ତୈଳ ପଠାଇବା ଉଦ୍ୟମ କରୁଥିବାରୁ ବଜାରର ଚିନ୍ତା କିଛିଟା କମିଛି।
ଅନ୍ୟପକ୍ଷରେ, ଲାଲ ସାଗର ଓ ବାବ୍-ଅଲ-ମନ୍ଦେବ୍ ଅଞ୍ଚଳରେ ଜାହାଜ ଚଳାଚଳ ନେଇ ଚିନ୍ତା ଏବେ ବି ରହିଛି। ହୁତିଙ୍କ ଆକ୍ରମଣ ଫଳରେ ବାବ୍-ଅଲ-ମନ୍ଦେବ୍ ଦେଇ ଦୈନିକ ଜାହାଜ ଚଳାଚଳ ପ୍ରଥମେ କମିଥିଲା। ପରେ ଏହା ପୁଣି ବଢ଼ିଥିଲେ ମଧ୍ୟ ଭବିଷ୍ୟତରେ ହୁତିମାନେ ନିଜ ଟାର୍ଗେଟ୍ର ପରିସର ବଢ଼ାଇପାରନ୍ତି ବୋଲି ବିଶ୍ଳେଷକମାନେ ଆଶଙ୍କା ପ୍ରକାଶ କରିଛନ୍ତି।
ଏହି ସମସ୍ତ ଘଟଣା ମଧ୍ୟରେ ୟେମେନର ମାନବୀୟ ସଙ୍କଟ ମଧ୍ୟ ଗଭୀର ହେଉଛି। ସାମ୍ପ୍ରତିକ ଲଢ଼େଇ ଯୋଗୁଁ ପ୍ରାୟ ୧.୨୫ ଲକ୍ଷ ଲୋକ ଘରଛାଡ଼ିବାକୁ ବାଧ୍ୟ ହୋଇଥିବା ରିପୋର୍ଟ ରହିଛି। ଦୀର୍ଘଦିନ ଧରି ଚାଲିଥିବା ୟେମେନ ଗୃହଯୁଦ୍ଧ ଦେଶର ଅର୍ଥନୀତି, ଖାଦ୍ୟ ସୁରକ୍ଷା ଓ ସାଧାରଣ ଲୋକଙ୍କ ଜୀବନକୁ ଗଭୀର ଭାବେ ପ୍ରଭାବିତ କରିଛି।
ସେହିପରି ଆମେରିକା-ହୁତି ଆଲୋଚନା ଏବେ ଲାଲ ସାଗର ସଙ୍କଟରେ ଏକ ନୂଆ କୂଟନୈତିକ ପର୍ଯ୍ୟାୟ ଆଣିଛି। ତେବେ ଏହା ଏକ ସ୍ଥାୟୀ ସମାଧାନର ରୂପ ନେବ କି ନାହିଁ, ତାହା ଆଗାମୀ ଦିନର ଘଟଣାକ୍ରମ ଉପରେ ନିର୍ଭର କରିବ।
