ସହରାଞ୍ଚଳରେ ଜଳର ସୁଚିନ୍ତିତ ବ୍ୟବହାର ପାଇଁ ‘ସୁଜଳ’ ଅଭିଯାନ ଆରମ୍ଭ

ଭୁବନେଶ୍ୱର: ସହରାଞ୍ଚଳରେ ଜଳର ଅପଚୟ ରୋକିବା, ସୁରକ୍ଷିତ ପାନୀୟ ଜଳର ଗୁରୁତ୍ୱ ସମ୍ପର୍କରେ ଲୋକଙ୍କୁ ସଚେତନ କରିବା ଏବଂ ଜଳ ସଂରକ୍ଷଣକୁ ଦୈନନ୍ଦିନ ଜୀବନର ଅଂଶ କରିବା ଲକ୍ଷ୍ୟରେ ଓଡ଼ିଶା ସରକାର ‘ସୁଜଳ’ ଅଭିଯାନ ଆରମ୍ଭ କରିଛନ୍ତି। ଶୁକ୍ରବାର ରାଜ୍ୟବ୍ୟାପୀ ଭାବେ ଏହି ସଚେତନତା ଅଭିଯାନ ଆରମ୍ଭ ହୋଇଛି। ଅକ୍ଟୋବର ୧୬ ପର୍ଯ୍ୟନ୍ତ ଏହି ଅଭିଯାନ ଚାଲିବ।

ଭୁବନେଶ୍ୱରରେ ଆୟୋଜିତ ଏକ କାର୍ଯ୍ୟକ୍ରମରେ ଗୃହ ଓ ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର ‘ସୁଜଳ’ ସଚେତନତା ଭ୍ୟାନ୍‌ଗୁଡ଼ିକୁ ପତାକା ଦେଖାଇ ଅଭିଯାନର ଶୁଭାରମ୍ଭ କରିଥିଲେ। ଏହି ଅଭିଯାନ ମାଧ୍ୟମରେ ଜଳ ସଂରକ୍ଷଣର ଆବଶ୍ୟକତା, ସୁରକ୍ଷିତ ପାନୀୟ ଜଳର ଗୁରୁତ୍ୱ ଏବଂ ଜଳବାହିତ ରୋଗ ପ୍ରତିରୋଧ ସମ୍ପର୍କରେ ବ୍ୟାପକ ଜନସଚେତନତା ସୃଷ୍ଟି କରାଯିବ।

ସରକାରଙ୍କ ଉଦ୍ଦେଶ୍ୟ କେବଳ ଲୋକଙ୍କୁ ଜଳ ସଂରକ୍ଷଣ ବିଷୟରେ ସୂଚନା ଦେବା ନୁହେଁ, ବରଂ ଜଳ ଅପଚୟ ରୋକିବାରେ ସମସ୍ତଙ୍କ ସାମୂହିକ ଦାୟିତ୍ୱ ରହିଛି ବୋଲି ବୁଝାଇବା। ସୁରକ୍ଷିତ ଜଳର ଉପଲବ୍ଧତା ନିଶ୍ଚିତ କରିବା ସହିତ ଜଳସ୍ରୋତଗୁଡ଼ିକୁ ସୁରକ୍ଷିତ ରଖିବା ମଧ୍ୟ ଏହି ଅଭିଯାନର ଏକ ପ୍ରମୁଖ ଲକ୍ଷ୍ୟ।

ସହରାଞ୍ଚଳରେ ୨୪ ଘଣ୍ଟିଆ ପାନୀୟ ଜଳ ଯୋଗାଣ ନିଶ୍ଚିତ କରିବା ପାଇଁ ସରକାରଙ୍କ ପ୍ରୟାସ ପରିପ୍ରେକ୍ଷୀରେ ଏହି ଅଭିଯାନର ଗୁରୁତ୍ୱ ଅଧିକ ରହିଛି। ୨୦୨୫-୨୬ ମସିହାରେ ଏହି ୨୪ ଘଣ୍ଟିଆ ଜଳ ଯୋଗାଣ ବ୍ୟବସ୍ଥା ଅଧୀନରେ ୯ଟି ସହରାଞ୍ଚଳ ସ୍ଥାନୀୟ ସଂସ୍ଥା ବା ULBକୁ ସାମିଲ କରାଯାଇଛି। ଏହା ସହିତ ୨୦୨୬-୨୭ ପାଇଁ ୩୮ଟି ULBରେ ‘ସୁଜଳ’ କାର୍ଯ୍ୟକ୍ରମ ଅଧୀନରେ ଅଧିକ ୧,୫୦୦ କୋଟି ଟଙ୍କା ବ୍ୟୟ କରିବାକୁ ସରକାର ବ୍ୟବସ୍ଥା କରିଛନ୍ତି।

ଅଧିକାରୀମାନଙ୍କ ଅନୁସାରେ, ‘ସୁଜଳ’ ଅଧୀନରେ ଏପର୍ଯ୍ୟନ୍ତ ୫୪୪ଟି ଜଳ ଯୋଗାଣ ପ୍ରକଳ୍ପକୁ ଅନୁମୋଦନ ମିଳିଛି। ସେଥିରୁ ୨୮୯ଟି ପ୍ରକଳ୍ପ ସମ୍ପୂର୍ଣ୍ଣ ହୋଇସାରିଥିବା ବେଳେ ଅନ୍ୟ ପ୍ରକଳ୍ପଗୁଡ଼ିକର କାମ ଜାରି ରହିଛି। ୨୦୨୬-୨୭ ମସିହାରେ ମୋଟ ୩୯୧ଟି ପ୍ରକଳ୍ପ କରିବାର ଯୋଜନା ରହିଛି। ଏଥିରେ ୧୦୨ଟି ନୂଆ ପ୍ରକଳ୍ପ ରହିଛି ଏବଂ ଏହା ପାଇଁ ପ୍ରାୟ ୧,୫୦୦ କୋଟି ଟଙ୍କା ବ୍ୟୟ ଅଟକଳ କରାଯାଇଛି। ଏହା ବ୍ୟତୀତ ୨୦୨୭-୨୮ରେ ୯୨ଟି ପ୍ରକଳ୍ପ ପାଇଁ ୯୭୮ କୋଟି ଟଙ୍କା ବ୍ୟୟ କରିବାର ଯୋଜନା ରହିଛି।

ଜଳ ନିଗମ ଓଡ଼ିଶାର ଅଧିକାରୀମାନେ କହିଛନ୍ତି ଯେ ଜଳ ସଂରକ୍ଷଣ ପାଇଁ ଦୈନନ୍ଦିନ ଜୀବନରେ କିଛି ସରଳ ପଦକ୍ଷେପ ନେବା ଆବଶ୍ୟକ। ଆବଶ୍ୟକ ନଥିବା ସମୟରେ ଟ୍ୟାପ୍ ବନ୍ଦ ରଖିବା, ଟ୍ୟାପ୍ ଓ ପାଇପ୍‌ରେ ଲିକେଜ୍ ହେଲେ ଶୀଘ୍ର ମରାମତି କରିବା ଏବଂ ନଦୀ, ପୋଖରୀ, ନଳକୂପ ଓ ଅନ୍ୟାନ୍ୟ ଜଳସ୍ରୋତ ନିକଟରେ ଅଳିଆ ଆବର୍ଜନା ନ ପକାଇବା ଭଳି ପଦକ୍ଷେପ ଜଳ ଅପଚୟ କମାଇବା ସହିତ ଜଳର ଗୁଣବତ୍ତା ସୁରକ୍ଷିତ ରଖିବାରେ ସହାୟକ ହେବ।

‘ସୁଜଳ’ ଅଭିଯାନ ମାଧ୍ୟମରେ ସରକାରଙ୍କ ଜଳ ଯୋଗାଣ ପ୍ରକଳ୍ପ ସହିତ ନାଗରିକଙ୍କ ଦାୟିତ୍ୱବୋଧକୁ ମଧ୍ୟ ଗୁରୁତ୍ୱ ଦିଆଯାଉଛି। ଜଳ ଏକ ସୀମିତ ଓ ଅତ୍ୟନ୍ତ ମୂଲ୍ୟବାନ ପ୍ରାକୃତିକ ସମ୍ପଦ ହୋଇଥିବାରୁ ଏହାର ଅପଚୟ ରୋକିବା ଏବଂ ଭବିଷ୍ୟତ ପିଢ଼ି ପାଇଁ ଜଳସମ୍ପଦକୁ ସୁରକ୍ଷିତ ରଖିବାରେ ସରକାରଙ୍କ ସହ ଲୋକଙ୍କ ସହଯୋଗ ମଧ୍ୟ ଆବଶ୍ୟକ।

Leave a Reply