ଭୁବନେଶ୍ୱର: ରାଜଧାନୀ ଭୁବନେଶ୍ୱରର ପ୍ରମୁଖ ୟୁନିଟ୍-୧ ମାର୍କେଟ୍ରେ ଶନିବାର ଭୋର ସମୟରେ ଭୟାବହ ଅଗ୍ନିକାଣ୍ଡ ଘଟିଛି। ଏହି ଅଗ୍ନିକାଣ୍ଡରେ ମାର୍କେଟ୍ ଭିତରେ ଥିବା ଦୁଇଟି ଦୋକାନ ସମ୍ପୂର୍ଣ୍ଣ ଭାବେ ପୋଡ଼ି ଛାରଖାର ହୋଇଯାଇଛି। ଜଳିଯାଇଥିବା ଦୋକାନ ମଧ୍ୟରେ ଗୋଟିଏ ଗ୍ରୋସରି ଦୋକାନ ଏବଂ ଅନ୍ୟଟି ପୂଜା ସାମଗ୍ରୀ ବିକ୍ରି କରୁଥିବା ଦୋକାନ ଥିବା ଜଣାପଡ଼ିଛି। ଅଗ୍ନିକାଣ୍ଡ ଯୋଗୁଁ ଲକ୍ଷାଧିକ ଟଙ୍କାର ସମ୍ପତ୍ତି ନଷ୍ଟ ହୋଇଥିବା ଦୋକାନୀମାନେ କହିଛନ୍ତି।
ସୂଚନା ଅନୁସାରେ, ଶନିବାର ସକାଳୁ ମାର୍କେଟ୍ ଅଞ୍ଚଳରେ ଥିବା ଦୋକାନଗୁଡ଼ିକରୁ ଧୂଆଁ ବାହାରୁଥିବା କେତେକ ସ୍ଥାନୀୟ ଲୋକ ଦେଖିଥିଲେ। ପରେ ଦୋକାନ ଖୋଲାଯିବା ବେଳକୁ ଭିତରେ ନିଆଁ ଭୟଙ୍କର ଭାବେ ଜଳୁଥିବା ଦେଖାଯାଇଥିଲା। ନିଆଁ ଦ୍ରୁତଗତିରେ ବ୍ୟାପିଯିବାରୁ ଦୁଇଟି ଦୋକାନର ସାମଗ୍ରୀ ନଷ୍ଟ ହୋଇଯାଇଥିଲା।
ଅଗ୍ନିକାଣ୍ଡର ଖବର ପାଇ ତୁରନ୍ତ ଅଗ୍ନିଶମ ବିଭାଗକୁ ଖବର ଦିଆଯାଇଥିଲା। ଘଟଣାସ୍ଥଳରେ ଅଗ୍ନିଶମ ବିଭାଗର ଦୁଇଟି ଟିମ୍ ପହଞ୍ଚି ନିଆଁ ଲିଭାଇବା କାର୍ଯ୍ୟ ଆରମ୍ଭ କରିଥିଲେ। ଦୀର୍ଘ ସମୟର ଉଦ୍ୟମ ପରେ ନିଆଁକୁ ନିୟନ୍ତ୍ରଣକୁ ଅଣାଯାଇଥିଲା। ଅଗ୍ନିଶମ କର୍ମଚାରୀମାନେ ଦୋକାନ ଭିତରେ ରହିଯାଇଥିବା ନିଆଁକୁ ସମ୍ପୂର୍ଣ୍ଣ ଭାବେ ଲିଭାଇବା ସହ ଘଟଣାସ୍ଥଳକୁ ସୁରକ୍ଷିତ କରିଥିଲେ।
ପ୍ରାଥମିକ ଭାବେ ଏହି ଅଗ୍ନିକାଣ୍ଡର କାରଣ ବିଦ୍ୟୁତ୍ ସର୍ଟସର୍କିଟ୍ ହୋଇଥାଇପାରେ ବୋଲି ସନ୍ଦେହ କରାଯାଉଛି। ତେବେ ନିଆଁ ଲାଗିବାର ପ୍ରକୃତ କାରଣ ଅଗ୍ନିଶମ ବିଭାଗର ଯାଞ୍ଚ ପରେ ସ୍ପଷ୍ଟ ହେବ। ଜଣେ ଦୋକାନ ମାଲିକଙ୍କ କହିବା ଅନୁସାରେ, ଭୋର ପ୍ରାୟ ୫ଟା ସମୟରେ ନିଆଁ ଲାଗିଥିବା ସନ୍ଦେହ କରାଯାଉଛି। ମାର୍କେଟ୍ରେ ଦୋକାନଗୁଡ଼ିକ ପରସ୍ପରକୁ ଲାଗି ରହିଥିବାରୁ ନିଆଁ ଖୁବ୍ ଶୀଘ୍ର ବ୍ୟାପିବାର ଆଶଙ୍କା ରହିଥିଲା।
ଏହି ଘଟଣା ପରେ ୟୁନିଟ୍-୧ ମାର୍କେଟ୍ରେ ଅଗ୍ନିନିରାପତ୍ତା ବ୍ୟବସ୍ଥାକୁ ନେଇ ପୁଣିଥରେ ପ୍ରଶ୍ନ ଉଠିଛି। ଅତୀତରେ ମଧ୍ୟ ଏହି ଅଞ୍ଚଳରେ ବଡ଼ଧରଣର ଅଗ୍ନିକାଣ୍ଡ ଘଟିଥିବା ଦୋକାନୀମାନେ କହିଛନ୍ତି। ନିକଟ ଅତୀତରେ ଭୁବନେଶ୍ୱର ନମ୍ବର-୧ ହାଟରେ ଅଗ୍ନିକାଣ୍ଡ ଘଟି ୪୦ରୁ ଅଧିକ ଦୋକାନ ପୋଡ଼ିଯାଇଥିଲା। ଏହି ପରିପ୍ରେକ୍ଷୀରେ ମାର୍କେଟ୍ ଅଞ୍ଚଳରେ ନିୟମିତ ଅଗ୍ନିନିରାପତ୍ତା ଯାଞ୍ଚ, ବିଦ୍ୟୁତ୍ ତାର ଓ ସଂଯୋଗର ଯାଞ୍ଚ ଏବଂ ଜରୁରୀକାଳୀନ ଅଗ୍ନିନିର୍ବାପଣ ବ୍ୟବସ୍ଥାକୁ ଆହୁରି ମଜବୁତ କରିବା ପାଇଁ ଦାବି ହୋଇଛି।
ଅଗ୍ନିକାଣ୍ଡରେ ଦୋକାନର ସାମଗ୍ରୀ ସହ ବହୁ ମୂଲ୍ୟବାନ ଜିନିଷ ନଷ୍ଟ ହୋଇଥିବାରୁ ଦୋକାନ ମାଲିକମାନେ ଆର୍ଥିକ କ୍ଷତିର ସମ୍ମୁଖୀନ ହୋଇଛନ୍ତି। ଘଟଣା ପରେ ସ୍ଥାନୀୟ ଅଞ୍ଚଳରେ କିଛି ସମୟ ପାଇଁ ଆତଙ୍କର ପରିବେଶ ସୃଷ୍ଟି ହୋଇଥିଲା। ତେବେ ଅଗ୍ନିଶମ ବିଭାଗର ତ୍ୱରିତ ପଦକ୍ଷେପ ଯୋଗୁଁ ନିଆଁ ଅନ୍ୟ ଦୋକାନକୁ ବ୍ୟାପିବାରୁ ରୋକାଯାଇପାରିଥିଲା। ବର୍ତ୍ତମାନ ଘଟଣାର କାରଣ ଏବଂ କ୍ଷୟକ୍ଷତି ସମ୍ପର୍କରେ ଅଧିକ ତଥ୍ୟ ସଂଗ୍ରହ କରାଯାଉଛି।
