ବେଙ୍ଗାଲୁରୁ ସାଇବର କ୍ରାଇମ ପୋଲିସ୍ ତିନୋଟି ଇନଷ୍ଟାଗ୍ରାମ ଆକାଉଣ୍ଟର ମାଲିକଙ୍କ ବିରୋଧରେ ଏକ ଏଫ୍ଆଇଆର୍ (FIR) ରୁଜୁ କରିଛି। ସେମାନଙ୍କ ବିରୋଧରେ ସୋସିଆଲ୍ ମିଡିଆ ପ୍ଲାଟଫର୍ମରେ କଂଗ୍ରେସ ନେତା ତଥା ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ଲକ୍ଷ୍ୟ କରି ଅଶ୍ଳୀଳ ଓ ଅପମାନଜନକ ଭିଡିଓ ପୋଷ୍ଟ କରିବା ଏବଂ ଅଶ୍ଳୀଳ ମନ୍ତବ୍ୟ ଦେବାର ଅଭିଯୋଗ ରହିଛି।
ଅଭିଯୋଗ ଅନୁଯାୟୀ, କର୍ଣ୍ଣାଟକ ପ୍ରଦେଶ କଂଗ୍ରେସ କମିଟି (KPCC)ର ଆଇନ ସେଲ୍ର ଜଣେ ସଦସ୍ୟ ଜୁଲାଇ ୨୫ ତାରିଖରେ ଇନଷ୍ଟାଗ୍ରାମରେ ଏହି ଭିଡିଓଟି ଦେଖିବାକୁ ପାଇଥିଲେ। ‘ground.reality_india’ ନାମକ ଏକ ଆକାଉଣ୍ଟ୍ ଦ୍ୱାରା ଜୁଲାଇ ୧୬ ତାରିଖରେ ଅପଲୋଡ୍ କରାଯାଇଥିବା ଏହି ଭିଡିଓରେ ରାହୁଲ ଗାନ୍ଧୀଙ୍କ ଏକ ଛବି ସହିତ ଅଶ୍ଳୀଳ, ଯୌନ-ସମ୍ବନ୍ଧୀୟ ଏବଂ ଅପମାନଜନକ ମନ୍ତବ୍ୟ ରହିଥିଲା, ଯାହାର ଉଦ୍ଦେଶ୍ୟ ଥିଲା ତାଙ୍କ ଭାବମୂର୍ତ୍ତିକୁ କ୍ଷୁର୍ଣ୍ଣ କରିବା।
ଏହି ଏଫଆଇଆର ଏପରି ସମୟରେ ପଞ୍ଜିକୃତ ହୋଇଛି ଯେତେବେଳେ ରାହୁଲ ଗାନ୍ଧୀ ଛାତ୍ର ସମସ୍ୟାକୁ ନେଇ କେନ୍ଦ୍ର ସରକାରଙ୍କୁ ଲଗାତାର ଘେରି ଆସୁଛନ୍ତି, ପ୍ରତିବାଦ କରୁଥିବା ଛାତ୍ରମାନଙ୍କ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନ କରିବାକୁ ଏବଂ କୌଣସି ଏଫଆଇଆର ଦାଖଲ ନ କରିବାକୁ ଅନୁରୋଧ କରୁଛନ୍ତି।
ରାହୁଲ ଗାନ୍ଧୀଙ୍କ ଭାବମୂର୍ତ୍ତି କ୍ଷୁଣ୍ଣ କରିବା ନେଇ ଅଭିଯୋଗ
ବେଙ୍ଗାଲୁରୁରେ ଦାଏର ହୋଇଥିବା ଏକ ଅଭିଯୋଗରେ କୁହାଯାଇଛି ଯେ, “ବିରୋଧୀ ଦଳ କାହିଁକି ଏତେ ନିରବ?” ଶୀର୍ଷକ ଥିବା ଉକ୍ତ ଭିଡିଓଟି କଂଗ୍ରେସ ନେତାଙ୍କୁ ଅପମାନିତ କରିବା ଏବଂ ତାଙ୍କ ଭାବମୂର୍ତ୍ତି କ୍ଷୁଣ୍ଣ କରିବା ଉଦ୍ଦେଶ୍ୟରେ ପ୍ରସ୍ତୁତ କରାଯାଇଥିଲା।
ଏହା ମଧ୍ୟ କୁହାଯାଇଛି ଯେ ଅନେକ ବ୍ୟବହାରକାରୀ ଭିଡିଓ ତଳେ ଅଶ୍ଳୀଳ ଓ ଅପମାନଜନକ ମନ୍ତବ୍ୟ ପୋଷ୍ଟ କରିଥିଲେ। ଅଭିଯୋଗକାରୀଙ୍କ ଅନୁଯାୟୀ, କିଛି ମନ୍ତବ୍ୟରେ ଯୌନ ଉତ୍ତେଜନାମୂଳକ କଥା, ଅପମାନଜନକ ଭାଷା ଏବଂ ମହିଳାଙ୍କ ସମ୍ମାନ କ୍ଷୁର୍ଣ୍ଣ କରୁଥିବା ବିଷୟବସ୍ତୁ ରହିଥିଲା। ଅଭିଯୋଗ ରହିଛି ଯେ ଅନେକ ବ୍ୟବହାରକାରୀ ସେହି ସମାନ ପୋଷ୍ଟରେ ସମାନ ଧରଣର ଉତ୍ତେଜନାମୂଳକ ମନ୍ତବ୍ୟ ମଧ୍ୟ ପୋଷ୍ଟ କରିଥିଲେ।
ଅଭିଯୋଗକାରୀ ଦାୟୀ ବ୍ୟକ୍ତିମାନଙ୍କ ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ଦାବି କରିବା ସହ ଭିଡିଓ ଅପଲୋଡ୍ କରିଥିବା ବ୍ୟକ୍ତି ଏବଂ ଆପତ୍ତିଜନକ ମନ୍ତବ୍ୟ ଦେଇଥିବା ୟୁଜର୍ମାନଙ୍କୁ ଚିହ୍ନଟ କରିବାକୁ ଦାବି କରିଛନ୍ତି।
