ଓଡ଼ିଶାର ସ୍କୁଲ ଓ କଲେଜରେ ଆରମ୍ଭ ହେବ ନିଶା ନିବାରଣ ପାଠ୍ୟକ୍ରମ, ଶିକ୍ଷକଙ୍କୁ ମିଳିବ ସ୍ୱତନ୍ତ୍ର ପ୍ରଶିକ୍ଷଣ: ମୁଖ୍ୟମନ୍ତ୍ରୀ

ଭୁବନେଶ୍ୱର: ରାଜ୍ୟର ଯୁବପିଢ଼ିଙ୍କୁ ନିଶା କବଳରୁ ରକ୍ଷା କରିବା ସହ ଓଡ଼ିଶାକୁ ନିଶାମୁକ୍ତ କରିବା ଲକ୍ଷ୍ୟରେ ଏକ ବଡ଼ ପଦକ୍ଷେପ ନେବାକୁ ଯାଉଛନ୍ତି ରାଜ୍ୟ ସରକାର। ଏଣିକି ସ୍କୁଲ ଓ କଲେଜ ସ୍ତରରେ ନିଶା ନିବାରଣ ସମ୍ପର୍କିତ ସ୍ୱତନ୍ତ୍ର ପାଠ୍ୟକ୍ରମ ବା ମଡ୍ୟୁଲ୍‌ ଆରମ୍ଭ କରାଯିବ। ଏହାସହ ଛାତ୍ରଛାତ୍ରୀଙ୍କ ମଧ୍ୟରେ ନିଶା ସେବନର ପ୍ରାରମ୍ଭିକ ଲକ୍ଷଣ ଚିହ୍ନଟ କରିବା ପାଇଁ ଶିକ୍ଷକମାନଙ୍କୁ ମଧ୍ୟ ସ୍ୱତନ୍ତ୍ର ପ୍ରଶିକ୍ଷଣ ଦିଆଯିବ। ମଙ୍ଗଳବାର ଭୁବନେଶ୍ୱରର କଳିଙ୍ଗ ଷ୍ଟାଡିୟମରେ ଆୟୋଜିତ ଯୁବ ମହୋତ୍ସବ ‘ଉମଙ୍ଗ’ରେ ଏହି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ।

ରାଜ୍ୟ ସରକାର ଓ ଆର୍ଟ ଅଫ୍‌ ଲିଭିଂ ଫାଉଣ୍ଡେସନ୍‌ର ମିଳିତ ଆୟୋଜନରେ ଏହି ଯୁବ ମହୋତ୍ସବ ଅନୁଷ୍ଠିତ ହୋଇଥିଲା। ଏଥିରେ ଯୋଗଦେଇ ମୁଖ୍ୟମନ୍ତ୍ରୀ କହିଥିଲେ ଯେ, ନିଶାମୁକ୍ତ ଓଡ଼ିଶା ଗଠନ କରିବା କେବଳ ସରକାରଙ୍କ ଲକ୍ଷ୍ୟ ନୁହେଁ, ଏହା ଏକ ଦୃଢ଼ ସଂକଳ୍ପ। ଯୁବପିଢ଼ି ହେଉଛନ୍ତି ରାଜ୍ୟର ପ୍ରକୃତ ଶକ୍ତି। ସେମାନଙ୍କ ଶକ୍ତି ଓ ସାମର୍ଥ୍ୟକୁ ସଠିକ୍‌ ଦିଗରେ ବିନିଯୋଗ କରାଗଲେ ଓଡ଼ିଶାର ବିକାଶ ସହ ବିକଶିତ ଭାରତ ଗଠନର ସ୍ୱପ୍ନ ପୂରଣ ହୋଇପାରିବ।

ମୁଖ୍ୟମନ୍ତ୍ରୀ କହିଥିଲେ ଯେ, ଶିକ୍ଷାନୁଷ୍ଠାନଗୁଡ଼ିକୁ ନିଶାମୁକ୍ତ ପରିସର ଭାବେ ଘୋଷଣା କରାଯାଇଛି। ସ୍କୁଲ, କଲେଜ ଓ ଅନ୍ୟ ଶିକ୍ଷାନୁଷ୍ଠାନ ପରିସରରେ ନିଶାଦ୍ରବ୍ୟର ବ୍ୟବହାର ଓ ବିକ୍ରିକୁ ନିଷିଦ୍ଧ କରାଯାଇଛି। ନୂତନ ନିଶା ନିବାରଣ ମଡ୍ୟୁଲ୍‌ ମାଧ୍ୟମରେ ଛାତ୍ରଛାତ୍ରୀଙ୍କୁ ନିଶା ସେବନର କୁପରିଣାମ, ଏହାର ଶାରୀରିକ ଓ ମାନସିକ ପ୍ରଭାବ ସମ୍ପର୍କରେ ସଚେତନ କରାଯିବ।

ରାଜ୍ୟରେ କେନ୍ଦ୍ର ସରକାରଙ୍କ ‘ନଶା ମୁକ୍ତ ଭାରତ ଅଭିଯାନ’ ସମସ୍ତ ୩୦ଟି ଜିଲ୍ଲାରେ ପହଞ୍ଚିଛି। ଏହି ଅଭିଯାନ ମାଧ୍ୟମରେ ପ୍ରାୟ ୩୮ ଲକ୍ଷ ଲୋକଙ୍କୁ ସଚେତନ କରାଯାଇଛି। ସେଥିମଧ୍ୟରେ ୧୬ ଲକ୍ଷ ଯୁବକ ଓ ଯୁବତୀ ରହିଛନ୍ତି। ଅନ୍ୟପଟେ ରାଜ୍ୟ ସରକାରଙ୍କ ‘ଦିଶା’ କାର୍ଯ୍ୟକ୍ରମ ଅଧୀନରେ ନିଶାସକ୍ତ ୧୨,୨୨୭ ଜଣଙ୍କୁ ଆବାସିକ ପୁନର୍ବାସ ସେବା ଯୋଗାଇ ଦିଆଯାଇଛି। ୧୦ଟି ଜିଲ୍ଲାରେ ଏହି ସେବା ଉପଲବ୍ଧ ହୋଇଛି।

ଏହି ପୁନର୍ବାସ ବ୍ୟବସ୍ଥାକୁ ଆହୁରି ସୁଦୃଢ଼ କରିବା ପାଇଁ ସରକାର ୨୦୨୫-୨୬ ଆର୍ଥିକ ବର୍ଷରେ ୧୪ କୋଟି ଟଙ୍କା ଏବଂ ୨୦୨୬-୨୭ ଆର୍ଥିକ ବର୍ଷରେ ୧୬.୪୧ କୋଟି ଟଙ୍କା ବ୍ୟୟବରାଦ କରିଛନ୍ତି।

କାର୍ଯ୍ୟକ୍ରମରେ ଆର୍ଟ ଅଫ୍‌ ଲିଭିଂର ପ୍ରତିଷ୍ଠାତା ଶ୍ରୀଶ୍ରୀ ରବିଶଙ୍କର ଯୁବପିଢ଼ିଙ୍କୁ ନିଶାଠାରୁ ଦୂରେଇ ରହିବାକୁ ଆହ୍ୱାନ ଦେଇଥିଲେ। ଧ୍ୟାନ, ଯୋଗ, ପ୍ରାଣାୟାମ ଓ ଆତ୍ମଚିନ୍ତନ ଦ୍ୱାରା ମନୁଷ୍ୟ ପ୍ରକୃତ ଆନନ୍ଦ ପାଇପାରିବ ବୋଲି ସେ କହିଥିଲେ।

ଏହି ଅବସରରେ ମନ୍ତ୍ରୀ ସୂର୍ଯ୍ୟବଂଶୀ ସୂରଜ, ସମ୍ପଦ ଚନ୍ଦ୍ର ସ୍ୱାଇଁ ଓ ରବି ନାରାୟଣ ନାଏକ ଉପସ୍ଥିତ ଥିଲେ। ମନ୍ତ୍ରୀ ସୂର୍ଯ୍ୟବଂଶୀ ସୂରଜ ଉପସ୍ଥିତ ଛାତ୍ରଛାତ୍ରୀ ଓ ଯୁବକଯୁବତୀଙ୍କୁ ନିଶାଠାରୁ ଦୂରେଇ ରହି ସୁସ୍ଥ ଓ ବିକଶିତ ଓଡ଼ିଶା ଗଠନ ପାଇଁ ସାମୂହିକ ଶପଥ ପାଠ କରାଇଥିଲେ।

ସରକାରଙ୍କ ଏହି ପଦକ୍ଷେପ କେତେ ସଫଳ ହେଉଛି, ତାହା ଆଗାମୀ ଦିନରେ ଗୁରୁତ୍ୱପୂର୍ଣ୍ଣ ହେବ। ତେବେ ଶିକ୍ଷାନୁଷ୍ଠାନରୁ ନିଶାମୁକ୍ତ ସମାଜ ଗଠନ ପାଇଁ ଏହା ଏକ ଗୁରୁତ୍ୱପୂର୍ଣ୍ଣ ପ୍ରୟାସ ବୋଲି କୁହାଯାଉଛି।

Leave a Reply