ସମ୍ବଲପୁର: ବ୍ୟକ୍ତିଗତ ସ୍ୱାର୍ଥ ଓ ହିତକୁ ପଛରେ ପକାଇ ସମାଜର ସାମୂହିକ ବିକାଶ ପାଇଁ କାମ କରିବାକୁ ଭାରତୀୟ ଜନତା ପାର୍ଟି (ବିଜେପି)ର କର୍ମୀମାନଙ୍କୁ ଆହ୍ୱାନ ଦେଇଛନ୍ତି ସମ୍ବଲପୁର ସାଂସଦ ତଥା ପୂର୍ବତନ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ରବିବାର ସମ୍ବଲପୁରର ଦେବେଇପାଲିଠାରେ ଆୟୋଜିତ ବିଜେପିର ବର୍ଦ୍ଧିତ ଜିଲ୍ଲା କାର୍ଯ୍ୟକାରିଣୀ ବୈଠକରେ ଯୋଗଦେଇ ସେ ଦଳୀୟ ସଂଗଠନକୁ ତୃଣମୂଳ ସ୍ତରରେ ଆହୁରି ସୁଦୃଢ଼ କରିବା ଉପରେ ଗୁରୁତ୍ୱ ଦେଇଥିଲେ।
ଧର୍ମେନ୍ଦ୍ର ପ୍ରଧାନ କହିଥିଲେ, ଲୋକମାନେ ଦଳକୁ ସେବା କରିବାର ଦାୟିତ୍ୱ ଦେଇଛନ୍ତି। ତେଣୁ ରାଜନୀତିରେ ସମସ୍ତଙ୍କୁ ସାଙ୍ଗରେ ନେଇ ଆଗକୁ ବଢ଼ିବା ଆବଶ୍ୟକ। ଦଳୀୟ କର୍ମୀମାନେ ନିଜସ୍ୱ ଲାଭ କିମ୍ବା ସ୍ୱାର୍ଥ ଅପେକ୍ଷା ସମାଜର ବ୍ୟାପକ ହିତକୁ ପ୍ରାଥମିକତା ଦେବା ଉଚିତ ବୋଲି ସେ ମତ ଦେଇଥିଲେ।
ଆଗାମୀ ଦିନରେ ଓଡ଼ିଶାରେ ହେବାକୁ ଥିବା ପଞ୍ଚାୟତ, ପୌର, ଏନ୍ଏସି ଏବଂ ସମବାୟ ନିର୍ବାଚନ ପାଇଁ କର୍ମୀମାନଙ୍କୁ ପ୍ରସ୍ତୁତ ରହିବାକୁ ମଧ୍ୟ ସେ ଆହ୍ୱାନ ଦେଇଥିଲେ। ସମ୍ବଲପୁର ଜିଲ୍ଲାରେ ଦଳର ତୃଣମୂଳ ସଂଗଠନ ମଜବୁତ ଥିବା ଦାବି କରିବା ସହ ଆଗାମୀ ନିର୍ବାଚନକୁ ଦୃଷ୍ଟିରେ ରଖି ଏହାକୁ ଆହୁରି ସୁଦୃଢ଼ କରିବାର ଆବଶ୍ୟକତା ଥିବା ସେ କହିଥିଲେ।
ଏହା ସହିତ ଚାଲିଥିବା ‘ସେବା ପକ୍ଷ’ କାର୍ଯ୍ୟକ୍ରମକୁ ଲୋକଙ୍କ ପାଖରେ ପହଞ୍ଚାଇବାକୁ ସେ କର୍ମୀମାନଙ୍କୁ କହିଥିଲେ। ଗରିବ, ମହିଳା, ଯୁବକ, ଆଦିବାସୀ ଏବଂ ଅନ୍ୟାନ୍ୟ ଅସହାୟ ଓ ଦୁର୍ବଳ ବର୍ଗର ଲୋକମାନେ ଯେପରି ସରକାରୀ କଲ୍ୟାଣକାରୀ ଯୋଜନାର ସୁବିଧା ପାଇପାରିବେ, ସେଥିପାଇଁ ଦଳୀୟ କର୍ମୀମାନେ ସହାୟକ ଭୂମିକା ନେବା ଆବଶ୍ୟକ ବୋଲି ସେ ଉଲ୍ଲେଖ କରିଥିଲେ।
ସ୍ୱଚ୍ଛତା, ପୋଷଣ ଏବଂ ନିଶାମୁକ୍ତି ଭଳି ବିଷୟକୁ କେବଳ ଅଭିଯାନରେ ସୀମିତ ନରଖି ଏହାକୁ ଜନଆନ୍ଦୋଳନର ରୂପ ଦେବାକୁ ଧର୍ମେନ୍ଦ୍ର ପ୍ରଧାନ ଆହ୍ୱାନ ଦେଇଥିଲେ। ଏଥିପାଇଁ ସାଧାରଣ ଲୋକଙ୍କୁ ଅଧିକ ସଂଖ୍ୟାରେ ସାମିଲ କରିବା ଉପରେ ସେ ଜୋର ଦେଇଥିଲେ। ଆଗାମୀ ଦିନରେ ସମ୍ବଲପୁର ପୌରାଞ୍ଚଳ ସହ ଗ୍ରାମାଞ୍ଚଳରେ ବଡ଼ ଧରଣର ସ୍ୱଚ୍ଛତା ଅଭିଯାନ ଆୟୋଜନ କରାଯିବ ବୋଲି ମଧ୍ୟ ସେ କହିଥିଲେ।
ଏକ ସାମାଜିକ ସଂଗଠନର ମୁଖ୍ୟ ଉଦ୍ଦେଶ୍ୟ ହେଉଛି ସମାଜକୁ ସଠିକ୍ ଦିଗ ଦେଖାଇବା ଏବଂ ଗରିବ, ଦୁର୍ବଳ, ମହିଳା, ଯୁବକ ଓ ଆଦିବାସୀଙ୍କ ସ୍ୱର ହେବା ବୋଲି ପ୍ରଧାନ କହିଥିଲେ। ସରକାର ଓ ସାଧାରଣ ଲୋକଙ୍କ ମଧ୍ୟରେ ଦଳୀୟ କର୍ମୀମାନେ ଏକ ସେତୁ ଭଳି କାମ କରିବା ଉଚିତ ବୋଲି ସେ ମତ ରଖିଥିଲେ।
ଏହି ବୈଠକରେ ଆଗାମୀ ଦିନର ସାଂଗଠନିକ କାର୍ଯ୍ୟକ୍ରମ, ଜନସେବା ଏବଂ ନିର୍ବାଚନୀ ପ୍ରସ୍ତୁତିକୁ ନେଇ ଦଳୀୟ ସ୍ତରରେ ଆଲୋଚନା ହୋଇଥିବା ଜଣାପଡ଼ିଛି।
