ଚେନ୍ନାଇ: ତାମିଲନାଡୁର ଅର୍ଥମନ୍ତ୍ରୀ ଏନ୍. ମାରି ୱିଲସନଙ୍କୁ ମାଡ୍ରାସ ହାଇକୋର୍ଟ କଡ଼ା ଭର୍ତ୍ସନା କରିଛନ୍ତି। ଏକ ଅପରାଧିକ ମାମଲାରେ ପୁଡୁଚେରୀର ନିମ୍ନ ଅଦାଲତରେ ବ୍ୟକ୍ତିଗତ ଭାବେ ହାଜର ହେବାରୁ ଛାଡ଼ ପାଇଁ ମନ୍ତ୍ରୀଙ୍କ ପକ୍ଷରୁ ଆବେଦନ କରାଯାଇଥିଲା। ଏହାକୁ ନେଇ ଶୁକ୍ରବାର ଶୁଣାଣି ସମୟରେ ଜଷ୍ଟିସ୍ ଭି. ଲକ୍ଷ୍ମୀନାରାୟଣନ୍ ମନ୍ତ୍ରୀଙ୍କୁ ପ୍ରଶ୍ନ କରିଥିଲେ—ସେ କ’ଣ ଇଂଲଣ୍ଡର ରାଜା ଯେ ଅଦାଲତରେ ହାଜର ହେବେ ନାହିଁ? ଅଦାଲତ ସ୍ପଷ୍ଟ କରିଦେଇଛନ୍ତି ଯେ ମନ୍ତ୍ରୀ ହେବାର ଅର୍ଥ ଆଇନଠାରୁ ଉପରେ ରହିବା ନୁହେଁ।
ଘଟଣାଟି ୨୦୨୨ ମସିହାର ଏକ ଅଭିଯୋଗ ସହ ଜଡ଼ିତ। ପୁଡୁଚେରୀର ଲାସପେଟ୍ ପୁଲିସ ମାରି ୱିଲସନ, ତାଙ୍କ ବାପା ଏବଂ ପରିବାରର ଅନ୍ୟ ସଦସ୍ୟଙ୍କ ବିରୋଧରେ ମାମଲା ରୁଜୁ କରିଥିଲା। ତାଙ୍କ ଭାଇଙ୍କ ପରିବାର ସହ ହୋଇଥିବା ବିବାଦକୁ କେନ୍ଦ୍ର କରି ମାରପିଟ୍ ଓ ଅନ୍ୟାନ୍ୟ ଅଭିଯୋଗ ଆସିଥିଲା। ଅଭିଯୋଗ ଅନୁସାରେ, ୱିଲସନ ଏବଂ ତାଙ୍କ ବାପା ତାଙ୍କ ଭାଇ ଓ ଭାଉଜଙ୍କ ଘରେ ପ୍ରବେଶ କରି ସେମାନଙ୍କ ସହ ମାରପିଟ୍ କରିଥିଲେ। ଏହି ମାମଲାରେ ପୁଡୁଚେରୀର ନ୍ୟାୟିକ ମାଜିଷ୍ଟ୍ରେଟ୍ କୋର୍ଟରେ ପ୍ରକ୍ରିୟା ଚାଲିଛି।
ମାମଲାଟିକୁ ରଦ୍ଦ କରିବା ପାଇଁ ମନ୍ତ୍ରୀ ମାଡ୍ରାସ ହାଇକୋର୍ଟର ଦ୍ୱାରସ୍ଥ ହୋଇଥିଲେ। ଏଥିସହିତ ନିମ୍ନ ଅଦାଲତରେ ତାଙ୍କ ବ୍ୟକ୍ତିଗତ ହାଜରକୁ ଛାଡ଼ ଦେବା ପାଇଁ ମଧ୍ୟ ଅନୁରୋଧ କରାଯାଇଥିଲା। ମନ୍ତ୍ରୀଙ୍କ ଓକିଲ ଯୁକ୍ତି ଦେଇଥିଲେ ଯେ ତାମିଲନାଡୁ ବିଧାନସଭାର ଅଧିବେଶନ ଚାଲୁଥିବାରୁ ମନ୍ତ୍ରୀଙ୍କ ପାଇଁ କୋର୍ଟରେ ହାଜର ହେବା କଷ୍ଟକର। କିନ୍ତୁ ହାଇକୋର୍ଟ ଏହି ଯୁକ୍ତିକୁ ନେଇ କଡ଼ା ଆଭିମୁଖ୍ୟ ଦେଖାଇଥିଲେ।
ଶୁଣାଣି ସମୟରେ ଜଷ୍ଟିସ୍ ଲକ୍ଷ୍ମୀନାରାୟଣନ୍ କହିଥିଲେ ଯେ ମନ୍ତ୍ରୀ ହେବା ପରେ ଆଇନରୁ କେହି ଉପରେ ହୋଇଯାଆନ୍ତି ନାହିଁ। ଏପରିକି ପୂର୍ବତନ ପ୍ରଧାନମନ୍ତ୍ରୀ ପି.ଭି. ନରସିଂହ ରାଓ ମଧ୍ୟ ପଦରେ ଥିବା ସମୟରେ ଅଦାଲତରେ ହାଜର ହୋଇଥିବା ଉଦାହରଣ ଅଦାଲତ ଦେଇଥିଲେ। ତେଣୁ ଜଣେ ମନ୍ତ୍ରୀ ନିଜ ପଦବୀକୁ ଦର୍ଶାଇ ନ୍ୟାୟିକ ପ୍ରକ୍ରିୟାରୁ ଦୂରେଇ ରହିବା ଉଚିତ ନୁହେଁ ବୋଲି କୋର୍ଟ ମତ ଦେଇଥିଲେ।
ଏହି ମାମଲାରେ ପୂର୍ବରୁ ମଧ୍ୟ ସମାଧାନର ରାସ୍ତା ଖୋଜିବା ପାଇଁ ମଧ୍ୟସ୍ଥତା ପ୍ରକ୍ରିୟା ଆରମ୍ଭ କରାଯାଇଥିଲା। ପରିବାର ମଧ୍ୟରେ ବିବାଦ ଥିବାରୁ ମାଡ୍ରାସ ହାଇକୋର୍ଟ ପକ୍ଷରୁ ମାମଲାକୁ ମେଡିଏସନ୍ ସେଣ୍ଟରକୁ ପଠାଯାଇଥିଲା। କିନ୍ତୁ ପରେ ଅଭିଯୋଗକାରୀ ପକ୍ଷ ମଧ୍ୟସ୍ଥତାରୁ ଓହରିଯାଇଥିଲେ। ଫଳରେ ମାମଲାର ସମାଧାନ ମଧ୍ୟସ୍ଥତା ମାଧ୍ୟମରେ ହୋଇପାରିନଥିଲା।
ଅଦାଲତରେ ଶୁଣାଣି ସମୟରେ ମନ୍ତ୍ରୀଙ୍କ ଓକିଲ କହିଥିଲେ ଯେ ନୂଆ ଚାର୍ଜସିଟ୍ ଦାଖଲ ହୋଇଥିବାରୁ ବର୍ତ୍ତମାନର ଆବେଦନକୁ ପ୍ରତ୍ୟାହାର କରାଯିବ। ଏହା ସହିତ ମନ୍ତ୍ରୀଙ୍କୁ ଅଗଷ୍ଟ ୩୧ ପର୍ଯ୍ୟନ୍ତ ହାଜରରୁ ଛାଡ଼ ଦେବାକୁ ଅନୁରୋଧ କରାଯାଇଥିଲା। ପରେ ହାଇକୋର୍ଟ ଆବେଦନ ପ୍ରତ୍ୟାହାରକୁ ଅନୁମତି ଦେବା ସହ ନିର୍ଦ୍ଦିଷ୍ଟ ସମୟ ପର୍ଯ୍ୟନ୍ତ ଛାଡ଼ ଦେଇଥିଲେ।
ମାଡ୍ରାସ ହାଇକୋର୍ଟଙ୍କ ଏହି ଟିପ୍ପଣୀ ଏବେ ଚର୍ଚ୍ଚାରେ ରହିଛି। ଅଦାଲତଙ୍କ ମୁଖ୍ୟ ବାର୍ତ୍ତା ହେଉଛି—ପଦବୀ, ରାଜନୈତିକ ପ୍ରଭାବ କିମ୍ବା ସରକାରୀ ଦାୟିତ୍ୱ ଯାହା ହେଉନା କାହିଁକି, ଆଇନ ସମସ୍ତଙ୍କ ପାଇଁ ସମାନ। ଜଣେ ସାଧାରଣ ନାଗରିକଙ୍କ ଭଳି ଜନପ୍ରତିନିଧି ଓ ମନ୍ତ୍ରୀମାନଙ୍କୁ ମଧ୍ୟ ନ୍ୟାୟାଳୟର ନିର୍ଦ୍ଦେଶ ଓ ଆଇନଗତ ପ୍ରକ୍ରିୟାକୁ ସମ୍ମାନ କରିବାକୁ ପଡ଼ିବ।
ଏହି ଘଟଣା ପୁଣିଥରେ ନ୍ୟାୟ ବ୍ୟବସ୍ଥାରେ ‘ଆଇନ ଆଗରେ ସମସ୍ତେ ସମାନ’ ନୀତିର ଗୁରୁତ୍ୱକୁ ସାମ୍ନାକୁ ଆଣିଛି। ମାମଲାର ଆଗାମୀ ଶୁଣାଣିରେ ମନ୍ତ୍ରୀ କେବେ ନିମ୍ନ ଅଦାଲତରେ ହାଜର ହେବେ, ତାହା ନେଇ ତାଙ୍କ ପକ୍ଷରୁ ତାରିଖ ଜଣାଇବାକୁ କୁହାଯାଇଛି।
