ଇନଷ୍ଟାଗ୍ରାମ ଏବଂ ଫେସବୁକର ମୂଳ କମ୍ପାନୀ ‘ମେଟା’ (Meta) କୁ ଆମେରିକାର ଏକ ଅଦାଲତରେ ବଡ଼ ଧରଣର ଝଟକା ଲାଗିଛି। ପିଲାମାନଙ୍କ ମାନସିକ ସ୍ୱାସ୍ଥ୍ୟର କ୍ଷତି କରିବା ଏବଂ ସୁରକ୍ଷା ମାନକକୁ ଅଣଦେଖା କରିବା ଅଭିଯୋଗରେ ନ୍ୟୁ ମେକ୍ସିକୋର ଏକ ଅଦାଲତ ମେଟା (ଫେସବୁକ-ଇନଷ୍ଟାଗ୍ରାମ) ଉପରେ ୫୬୭ ନିୟୁତ ଡଲାର (ପ୍ରାୟ ୫,୩୯୦ କୋଟି ଟଙ୍କା)ର ଭାରୀ ଜୋରିମାନା ଲଗାଇଛି।
ବିଚାରପତି ବ୍ରայନ୍ ବିଡ୍ସାଇଡ୍ (Brian Biedscheid) କହିଛନ୍ତି ଯେ କମ୍ପାନୀ ପିଲାମାନଙ୍କ ସୁରକ୍ଷା ଅପେକ୍ଷା ଲାଭକୁ ଅଧିକ ଗୁରୁତ୍ୱ ଦେଇଥିଲା, ଯାହା ଫଳରେ ସେମାନଙ୍କ ମାନସିକ ସ୍ୱାସ୍ଥ୍ୟ ଉପରେ ଗୁରୁତର ପ୍ରଭାବ ପଡ଼ିଥିଲା। ଅଦାଲତ ନିର୍ଦ୍ଦେଶ ଦେଇଛନ୍ତି ଯେ ଜରିମାନା ଅର୍ଥର ଅଧିକାଂଶ ଅଂଶ ଯୁବବର୍ଗଙ୍କ ଚିକିତ୍ସା ପାଇଁ ବ୍ୟବହାର କରାଯିବ ଏବଂ ବାକି ଅର୍ଥ ଆଗାମୀ ପାଞ୍ଚ ବର୍ଷ ମଧ୍ୟରେ ସଚେତନତା ଓ ପ୍ରତିରୋଧ, ସ୍କ୍ରିନିଂ ସେବା ତଥା ଅନ୍ୟାନ୍ୟ ଖର୍ଚ୍ଚ ବାବଦରେ ଖର୍ଚ୍ଚ କରାଯିବ।
ଆମେରିକାରେ ଅଭୂତପୂର୍ବ ପଦକ୍ଷେପ
ଏହା ପ୍ରଥମ ଘଟଣା ଯେଉଁଥିରେ ଆମେରିକାର ଏକ ରାଜ୍ୟ କୌଣସି ପ୍ରମୁଖ ଟେକ୍ କମ୍ପାନୀ ବିରୁଦ୍ଧରେ ଏଭଳି ପଦକ୍ଷେପ ଗ୍ରହଣ କରିଛି। କମ୍ପାନୀକୁ ଦାୟୀ କରି ଅଦାଲତ ଏହି ରାୟ ପ୍ରଦାନ କରିଛନ୍ତି। ଅଦାଲତଙ୍କ ଅନୁଯାୟୀ, ୫୬୭ ନିୟୁତ ଡଲାରର ବୁଝାମଣା ରାଶି ମଧ୍ୟରୁ ୪୨୦ ନିୟୁତ ଡଲାର ଯୁବବର୍ଗଙ୍କ ଚିକିତ୍ସା ପାଇଁ ଖର୍ଚ୍ଚ କରାଯିବ।
ଦୁଇଟି ପର୍ଯ୍ୟାୟରେ ରାୟ ପ୍ରଦାନ
ଏହି ନୂତନ ରାୟ, ମାମଲାର ପ୍ରଥମ ପର୍ଯ୍ୟାୟରେ ‘ମେଟା’ (Meta) ଉପରେ ଲାଗୁ କରାଯାଇଥିବା ୩୭୫ ନିୟୁତ ଡଲାରର ଜୋରିମାନା ବ୍ୟତୀତ ଅନ୍ୟ ଏକ ପଦକ୍ଷେପ ଅଟେ। ଉଭୟକୁ ମିଶାଇଲେ ବର୍ତ୍ତମାନ ମୋଟ ଜୋରିମାନାର ପରିମାଣ ୯୪୨ ନିୟୁତ ଡଲାରରେ ପହଞ୍ଚିଛି।
ପ୍ରଥମ ପର୍ଯ୍ୟାୟରେ, ଜୁରୀ (ବିଚାରକ ମଣ୍ଡଳୀ) ଏହା ସ୍ଥିର କରିଥିଲେ ଯେ କମ୍ପାନୀ ଜାଣିଶୁଣି ପିଲାମାନଙ୍କ ମାନସିକ ସ୍ୱାସ୍ଥ୍ୟର କ୍ଷତି କରିଛି ଏବଂ ନିଜ ପ୍ଲାଟଫର୍ମରେ ପିଲାମାନଙ୍କ ଯୌନ ଶୋଷଣ ସମ୍ବନ୍ଧୀୟ ତଥ୍ୟକୁ ଗୋପନ ରଖିଛି। ଏଥିପାଇଁ ‘ମେଟା’ ଉପରେ ୩୭୫ ନିୟୁତ ଡଲାରର ଜୋରିମାନା ଲଗାଯାଇଥିଲା।
ଏହି ସମୟରେ, ଦ୍ୱିତୀୟ ପର୍ଯ୍ୟାୟରେ, ସରକାରୀ ଓକିଲମାନେ ମେଟାରେ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଆଣିବାକୁ ବିଚାରପତିଙ୍କୁ ଅନୁରୋଧ କରିଥିଲେ। ଏହାର ଉଦ୍ଦେଶ୍ୟ ହେଉଛି କଠୋର ତଦାରଖ ଏବଂ ଡିଫଲ୍ଟ ଗୋପନୀୟତା ସେଟିଂ ମାଧ୍ୟମରେ ନିଶାକର ବୈଶିଷ୍ଟ୍ୟଗୁଡ଼ିକୁ ରୋକିବା, ବୟସ ଯାଞ୍ଚକରଣକୁ ଉନ୍ନତ କରିବା ଏବଂ ପିଲାମାନଙ୍କ ଯୌନ ଶୋଷଣକୁ ରୋକିବା।
