ପାକିସ୍ତାନୀ ସୁରକ୍ଷା ବାହିନୀ ରାୱାଲାକୋଟ୍ରେ ବିକ୍ଷୋଭକାରୀଙ୍କ ଉପରକୁ ଗୁଳିଚାଳନା କରିଥିଲା। ଏହି ଗୁଳିଚାଳନାରେ ଅତିକମରେ ୧୯ ଜଣ ଲୋକ ପ୍ରାଣ ହରାଇଥିବାବେଳେ ଦୁଇ ଡଜନରୁ ଅଧିକ ଲୋକ ଆହତ ହୋଇଥିଲେ। ‘ଜଏଣ୍ଟ ଆୱାମୀ ଆକ୍ସନ୍ କମିଟି’ (JAAC) ଏକ ଭିଡିଓ ଜାରି କରି କହିଛି ଯେ ବିକ୍ଷୋଭକାରୀଙ୍କ ଶୋଭାଯାତ୍ରା ‘ଚିନାର ଚୌକ୍’ରେ ପହଞ୍ଚିଥିଲା ଏବଂ ‘ଡି-ଚୌକ୍’ (D-Chowk) ଆଡ଼କୁ ଅଗ୍ରସର ହେଉଥିଲା; ପରେ ରାତି ବିତାଇବା ପାଇଁ ଏହା ରାୱାଲାକୋଟ୍ର ‘ମକବୁଲ୍ ଭଟ୍ ଶହୀଦ୍ ଚୌକ୍’ରେ ଅଟକିଥିଲା।
ଭିଡିଓରେ କୁହାଯାଇଛି, “ଆଜି ପାକିସ୍ତାନର ସୁରକ୍ଷା ବାହିନୀ ଆମର ନିରୀହ ଯୁବକମାନଙ୍କ ଉପରକୁ ଗୁଳିଚାଳନା କରିଛି। ଫଳସ୍ୱରୂପ, ଆମର ୧୯ ଜଣ ଯୁବକ ସହିଦ ହୋଇଛନ୍ତି। ସେମାନଙ୍କ ମଧ୍ୟରେ ଅଛନ୍ତି ଏହି ଆନ୍ଦୋଳନର ପ୍ରତିଷ୍ଠାତା ଉମର ନଜିର କାଶ୍ମୀରୀଙ୍କ ସାନ ଭାଇ ଉସମାନ ନଜିର। ଅନ୍ୟ ସହିଦମାନଙ୍କ ମଧ୍ୟରେ ଖାଇଗାଲା, କୋଟଲି ସହର, ତାଟ୍ଟାପାନି, ବଞ୍ଜା-ବାସପୁର, ଛୋଟା ଗାଲା ଏବଂ ହାଭେଲିରୁ ଜଣେ ଲେଖାଏଁ ସହଯୋଗୀ ସାମିଲ ଅଛନ୍ତି। ମୋଟ ଉପରେ ୧୯ ଜଣ ବ୍ୟକ୍ତି ସହିଦ ହୋଇଛନ୍ତି, ଯେଉଁଥିରେ ଆମର ଦୁଇଜଣ ବାଲୋଚ୍ ବନ୍ଧୁ ମଧ୍ୟ ଅନ୍ତର୍ଭୁକ୍ତ। ଏହା ବ୍ୟତୀତ ପ୍ରାୟ ଦୁଇ ଡଜନ ଲୋକ ଆହତ ହୋଇଛନ୍ତି।”
ସେ ବିଦେଶରେ ରହୁଥିବା କାଶ୍ମୀରୀମାନଙ୍କୁ ଏହି ପ୍ରସଙ୍ଗକୁ ଆନ୍ତର୍ଜାତୀୟ ସ୍ତରରେ ଉଠାଇବାକୁ ଆହ୍ୱାନ ଦେଇଥିଲେ ଏବଂ ଅଭିଯୋଗ କରିଥିଲେ ଯେ କର୍ତ୍ତୃପକ୍ଷ ବିକ୍ଷୋଭକାରୀଙ୍କ ଉପରେ ଅତ୍ୟାଚାର କରୁଛନ୍ତି। ସେ କହିଥିଲେ, “ଆମେ ଆଗକୁ ବଢ଼ୁଛୁ। ମୁଁ ବିଦେଶରେ ରହୁଥିବା କାଶ୍ମୀରୀମାନଙ୍କୁ ଏହି ଅତ୍ୟାଚାର ବିରୁଦ୍ଧରେ ସ୍ୱର ଉତ୍ତୋଳନ କରିବାକୁ ଆହ୍ୱାନ କରୁଛି। ରାଜ୍ୟ ସରକାର ଭୟଭୀତ ଅବସ୍ଥାରେ ଅଛନ୍ତି ଏବଂ ନରସଂହାରର ଆଶ୍ରୟ ନେଉଛନ୍ତି।”ଦୟାକରି ପାକିସ୍ତାନୀ ଦୂତାବାସ ଏବଂ ଜାତିସଂଘ (UN) ଭଳି ଅନ୍ତର୍ଜାତୀୟ ମାନବାଧିକାର ସଂଗଠନ ବାହାରେ ପ୍ରତିବାଦ କରନ୍ତୁ। ଲଙ୍ଗ ମାର୍ଚ୍ଚର ଅଂଶଗ୍ରହଣକାରୀଙ୍କ ସହିତ ଏକତା ଦେଖାଇବା ପାଇଁ ରାଲି ଆୟୋଜନ କରନ୍ତୁ।
ଉଲ୍ଲେଖନୀୟ ଯେ, ଭାରତ PoK (ପାକିସ୍ତାନ ଅଧିକୃତ କାଶ୍ମୀର)ରେ ହୋଇଥିବା ବିକ୍ଷୋଭକୁ ଇସଲାମାବାଦ ଦ୍ୱାରା “ଜବରଦସ୍ତି” ଦଖଲ କରାଯାଇଥିବା ଅଞ୍ଚଳରେ ଦୀର୍ଘ ଦଶନ୍ଧି ଧରି ଚାଲିଥିବା “ସୁବ୍ୟବସ୍ଥିତ ଶୋଷଣ ଓ ପ୍ରଶାସନିକ ଦମନ”ର “ସିଧାସଳଖ ଫଳାଫଳ” ବୋଲି ବର୍ଣ୍ଣନା କରିଛି ଏବଂ ବିକ୍ଷୋଭକାରୀଙ୍କ ଉପରେ ହୋଇଥିବା କଥିତ ପୋଲିସ୍ ଅତ୍ୟାଚାରର ସମାଲୋଚନା କରିଛି।
